വേതനം നൽകി ഹരിതകർമ്മസേന

മുക്കം: നഗരസഭയിലെ ഹരിതകർമ്മസേനാംഗങ്ങൾ തങ്ങളുടെ ഒരു ദിവസത്തെ വേതനം എസ്.എം.എ രോഗം ബാധിച്ച മൂന്ന് കുട്ടികളുടെ ചികിത്സാ സഹായനിധിയിലേക്ക് കൈമാറി. നേരത്തേയും ഹരിതകർമ്മസേന ചികിത്സാനിധിയിലേക്ക് 10,000 രൂപ കൈമാറിയിരുന്നു. നഗരസഭയിലെ 50 ഹരിതകർമ്മസേന അംഗങ്ങളുടെ ഒരു ദിവസത്തെ വേതനമായ 35,000 രൂപ ഹരിത കർമ്മ സേനാംഗങ്ങളിൽ നിന്ന് നഗരസഭ വൈസ് ചെയർപേഴ്‌സൺ സി.എ. പ്രദീപ് കുമാർ, ആരോഗ്യ സ്റ്റാന്റിംഗ് കമ്മിറ്റി ചെയർപേഴ്‌സൺ റാഷിദ് കുന്നത്ത് എന്നിവർ ഏറ്റുവാങ്ങി. ഭവനാ വിനോദ്, ലീല പുൽപറമ്പിൽ, സുനിൽ പൊയ്യേരി, നസീം, ഉഷാകുമാരി, ഇ.കെ. രാജേഷ്, വി.കെ. മജീദ്, വിശ്വംഭരൻ, സുനിൽകുമാർ എന്നിവർ പങ്കെടുത്തു.