ആർട്ടിമിസ് - 3 അടുത്ത വർഷം  യാത്രികരെ പ്രഖ്യാപിച്ചു

വാഷിംഗ്ടൺ: അമേരിക്കൻ സ്പേസ് ഏജൻസിയായ നാസയുടെ നിർണായകമായ ആർട്ടിമിസ് - 3 അടുത്ത വർഷം. നാസയുടെ ആൻഡ്രെ ഡഗ്ലസ്,​ ഫ്രാങ്ക് റൂബിയോ,​ റാൻഡി ബ്രെസ്‌നിക് എന്നിവരെയും ഇറ്റാലിയൻ സ്പേസ് ഏജൻസിയുടെ ലൂക്ക പാർമിറ്റാനോയേയും യാത്രികരായി പ്രഖ്യാപിച്ചു. നാസയുടെ ബോബ് ഹെയ്ന്റ്സിനെ ബാക്ക് അപ്പ് ക്രൂവായും തിരഞ്ഞെടുത്തു. രണ്ട് ആഴ്ച നീളുന്നതാണ് ദൗത്യം. ആർട്ടിമിസ് - 3യിലൂടെ യാത്രികരെ ചന്ദ്രനിൽ ഇറക്കുമെന്നാണ് നാസ നേരത്തെ പ്രഖ്യാപിച്ചിരുന്നത്. എന്നാൽ സംഘത്തെ വഹിക്കുന്ന ഒറിയോൺ പേടകത്തെ എസ്.എൽ.എസ് (സ്പേസ് ലോഞ്ച് സിസ്റ്റം)​ റോക്കറ്റ് ഭൂമിയിൽ നിന്ന് 290 മൈൽ ഉയരത്തിലുള്ള ഭ്രമണപഥത്തിലേക്കാണ് എത്തിക്കുക. ഇവിടെ വച്ച് സ്പേസ് എക്സിന്റെ സ്റ്റാർഷിപ്പ് എച്ച്.എൽ.എസ്, ബ്ലൂ ഒറിജിന്റെ ബ്ലൂ മൂൺ ലാൻഡറുകളുടെ പ്രോട്ടോടൈപ്പുകളെ പേടകവുമായി ഡോക്ക് ചെയ്യുന്ന സങ്കീർണ പ്രക്രിയ പൂർത്തിയാക്കും. വിജയിച്ചാൽ ആർട്ടിമിസ് 4 ലൂടെ മനുഷ്യനെ ചന്ദ്രനിൽ ഇറക്കാനാണ് പദ്ധതി. 1972ൽ അപ്പോളോ 17ലൂടെയാണ് മനുഷ്യൻ അവസാനമായി ചന്ദ്രനിലിറങ്ങിയത്.