കോട്ടയത്ത് കാണാതായ യുവതി മരിച്ചു; മൃതദേഹം കണ്ടെത്തിയത് മീനച്ചിലാറിന്റെ കൈവഴിയിൽ

കോട്ടയം: ചൊവ്വാഴ്‌ച വൈകിട്ട് മുതൽ കുമാരനല്ലൂരിൽ നിന്ന് കാണാതായ യുവതിയുടെ മൃതദേഹം മീനച്ചിലാറ്റിന്റെ കൈവഴിയിൽ കണ്ടെത്തി. കുമാരനല്ലൂർ കടവിൽ നിമിഷ ഷാജിയെയാണ് (26) മരിച്ച നിലയിൽ കണ്ടെത്തിയത്. യുവതിയെ കാണാതായതോടെ ബന്ധുക്കൾ ഇന്നലെ ഗാന്ധിനഗർ പൊലീസിൽ പരാതി നൽകിയിരുന്നു.

പരാതിയുടെ അടിസ്ഥാനത്തിൽ നടത്തിയ അന്വേഷണത്തിൽ ഇന്ന് രാവിലെ ഏഴ് മണിയോടെ കുമാരനല്ലൂർ വടക്കേ നടയ്‌ക്ക് സമീപത്ത് നിന്നാണ് മൃതദേഹം കണ്ടെത്തിയത്. കോട്ടയത്ത് നിന്നുള്ള അഗ്നിരക്ഷാ സേന കരയ്‌ക്കെത്തിച്ച മൃതദേഹം കോട്ടയം മെഡിക്കൽ കോളേജ് ആശുപത്രിയിലേക്ക് മാറ്റിയിട്ടുണ്ട്. സംഭവത്തിൽ ഗാന്ധിനഗർ പൊലീസ് കേസെടുത്ത് അന്വേഷണം ആരംഭിച്ചു.