ജിയോബേബി മുഖ്യ വേഷത്തിൽ എത്തുന്ന കൃഷ്ണാഷ്ടമി ഓഡിയോ റിലീസ് സെപ്തംബർ 21ന്

അമ്പലക്കര ഗ്ലോബൽ ഫിലിംസിന്റെ ബാനറിൽ അനിൽ അമ്പലക്കര നിർമ്മിച്ച് ഡോ. അഭിലാഷ് ബാബു സംവിധാനം ചെയ്യുന്ന ചിത്രം കൃഷ്ണാഷ്ടമി: the book of dry leavesന്റെ ഓഡിയോ റിലീസ് സെപ്തംബർ 21ന്. ഞായറാഴ്ച വൈകിട്ട് 4.30ന് തൃശൂർ റീജ്യണൽ തിയേറ്ററിൽ വച്ചാണ് ചടങ്ങ് നടക്കുന്നത്. വൈലോപ്പിള്ളി ശ്രീധരമേനോന്റെ കൃഷ്ണാഷ്ടമി എന്ന കവിതയുടെ ആധുനികകാല സിനിമാറ്റിക് വായനയാണ് ചിത്രത്തിലൂടെ അഭിലാഷ് ബാബു അവതരിപ്പിക്കുന്നത്. സൈന മ്യൂസിക് ആണ് വിതരണക്കാർ.

ഔസേപ്പച്ചൻ സംഗീത സംവിധായകനായിരിക്കുന്ന സിനിമയിൽ ഏഴു ഗാനങ്ങൾ ആണുള്ളത്. വൈലോപ്പിള്ളിയുടെ വരികൾക്ക് പുറമേ അഭിലാഷ് ബാബുവിൻ്റെ വരികളും സിനിമയിലുണ്ട്. ഔസേപ്പച്ചന് പുറമേ പി. എസ് വിദ്യാധരൻ, ജയരാജ് വാര്യർ, ഇന്ദുലേഖ വാര്യർ, സ്വർണ്ണ, അമൽ ആൻറണി ചാർളി ബഹറിൻ എന്നിവരാണ് മറ്റു ഗായകർ. സംവിധായകൻ ജിയോ ബേബി മുഖ്യ വേഷത്തിൽ എത്തുന്ന സിനിമ വരുന്ന മാസങ്ങളിൽ പ്രേക്ഷകരിലേക്ക് എത്തിച്ചേരും.

വൈലോപ്പിള്ളി ശ്രീധരമേനോന്റെ 1958ൽ പുറത്തിറങ്ങിയ 'കടൽക്കാക്കകൾ' എന്ന സമാഹാരത്തിൽ ഉൾപ്പെട്ട കവിതയാണ് 'കൃഷ്ണാഷ്ടമി'. ദുരധികാരപ്രയോഗത്തിന് ഇരയാകുന്ന നിസ്വരായ കുറച്ചു മനുഷ്യരുടെ ജയിലിലെ ജീവിതമാണ് കൃഷ്ണാഷ്ടമി പറയുന്നത്. ഇതിനെ പുതിയ കാലത്തിനനുസരിച്ച് കുറച്ച് മാറ്റങ്ങളും കൂട്ടിച്ചേർക്കലുകളും വരുത്തി ദൃശ്യഭാഷ നൽകിയിരിക്കുകയാണ് 'കൃഷ്ണാഷ്ടമി: the book of dry leaves'ൽ.

എക്സിക്യൂട്ടീവ് പ്രൊഡ്യൂസർ: കാർത്തിക് ജോഗേഷ് ചായാഗ്രഹണം: ജിതിൻ മാത്യു, എഡിറ്റർ: അനു ജോർജ്, സൗണ്ട്: രബീഷ് , പ്രൊഡക്ഷൻ ഡിസൈനർ: ദിലീപ് ദാസ് , പ്രൊഡക്ഷൻ കൺട്രോളർ: ജയേഷ് എൽ ആർ, പ്രോജക്ട് ഡിസൈനർ: ഷാജി എ ജോൺ, അസോസിയേറ്റ് ഡയറക്ടർ: അഭിജിത് ചിത്രകുമാർ മേക്കപ്പ്: ബിനു സത്യൻ കോസ്റ്റ്യൂം: അനന്തപത്മനാഭൻ.