ലിഫ്റ്റിൽ കുടുങ്ങിയത് ഒരു മണി​ക്കൂർ, യുവാവി​ന് രക്ഷകരായി ഫയർഫോഴ്സ്

കൊല്ലം: ചിന്നക്കട ബി.എസ്.എൻ.എൽ കെട്ടിടത്തിലെ ലിഫ്റ്റിൽ ഒരുമണിക്കൂറോളം കുടുങ്ങിയ യുവാവിനെ ഫയർഫോഴ്സ് രക്ഷപ്പെടുത്തി. കൊറിയർ ഡെലിവറി ജീവനക്കാരനായ വടക്കേവിള ഷാമൻസിലിൽ ഷാനവാസി​നെയാണ് (49) കടപ്പാക്കട ഫയർഫോഴ്സ് സംഘം രക്ഷപ്പെടുത്തിയത്.

ഇന്നലെ ഉച്ചയ്ക്ക് ഒന്നോടെയായിരുന്നു സംഭവം. കെട്ടിടത്തിന്റെ രണ്ടാംനിലയിൽ പ്രവർത്തിക്കുന്ന യൂണിയൻ ബാങ്കിൽ പാഴ്സൽ വന്നതാണ് ഷാനവാസ്. ലിഫ്റ്റിൽ താഴേക്ക് ഇറങ്ങുന്നതിനിടെ പ്രവർത്തനരഹിതമാവുകയായിരുന്നു. ലിഫ്റ്രിൽ രേഖപ്പെടുത്തിയിരുന്ന നമ്പറുകളിൽ ബന്ധപ്പെടാൻ ശ്രമിച്ചെങ്കിലും സാധിച്ചില്ല. എമർജൻസി ബട്ടൺ​ ഉപയോഗിച്ചെങ്കിലും ആരുമെത്തി​യി​ല്ല. തുടർന്ന് ഒരു മണിക്കൂറോളം കാത്തു നിന്ന ശേഷം ഷാനവാസ് തന്നെയാണ് താൻ കുടുങ്ങിയ വിവരം കടപ്പാക്കട ഫയർഫോഴ്സിനെ അറിയച്ചത്. ഉച്ചയ്ക്ക് 2.20 ഓടെ ഫയർഫോഴ്സ് എത്തിയപ്പോഴാണ് യുവാവ് ലിഫ്റ്റിൽ കുടുങ്ങിയ വിവരം കെട്ടിടത്തിലെ സുരക്ഷാജീവനക്കാർ ഉൾപ്പെടെ അറിയുന്നത്. രണ്ടുദിവസം മുൻപ് ലി​ഫ്റ്റി​ന്റെ അറ്റകുറ്റപ്പണി​ നടത്തിയിരുന്നുവെന്ന് ഉദ്യോഗസ്ഥർ അവകാശപ്പെടുന്നു. കടപ്പാക്കട സീനിയർ ഫയർ ആൻഡ് റെസ്ക്യു ഓഫീസർ സജി സൈമൺ, ഓഫീസർമാരായ ഷെഫീക്, ലിന്റുദാസ്, ആർ.രഞ്ജിത്ത്, അഖിൽ, ഡ്രൈവർ ഹാമിൽട്ടൻ എ​ന്നി​വ​രു​ടെ നേ​തൃ​ത്വ​ത്തി​ലാ​ണ് ര​ക്ഷാ​പ്ര​വ​ർത്ത​നം ന​ട​ത്തി​യ​ത്.