ഒറ്റത്തിരത്തോക്ക് (13)
ഉറങ്ങാത്തവരുടെ രാത്രി
''ഡോ. ആൻഡ്രൂസ് താങ്കൾ പറഞ്ഞത് വള്ളി പുള്ളി വിടാതെ കേട്ടെന്നു മാത്രമല്ല അതേ അളവിൽത്തന്നെ എനിക്ക് മനസിലാക്കാനും സാധിക്കുന്നുണ്ട്. അവസാനം താങ്കൾ പറഞ്ഞ ഒരു സ്വഭാവം വച്ച് നോക്കുമ്പോൾ അലീന നാമെല്ലാം വൈദ്യശാസ്ത്രത്തിൽ പറയുന്നത് പോലെ മൾട്ടിപ്പിൾ പെഴ്സനാലിറ്റിക്ക് വിധേയായിട്ടുള്ള ഒരു പെൺകുട്ടിയാണ്. വളരെ ഗൗരവത്തോടെയും അതേക്കാൾ അതീവ ജാഗ്രതയോടെയും കൈകാര്യം ചെയ്യേണ്ടുന്ന ഒരു സംഗതിയാണിത്. പിന്നെ താങ്കൾ കരുതുന്നത് പോലെ ഒരു എക്സോർസിസം എന്നത് അത്രമാത്രം എളുപ്പവുമല്ല, പെട്ടെന്ന് ചെയ്യാൻ കഴിയുന്നതുമല്ല. വിദേശരാജ്യങ്ങളുടേതുപോലെയല്ല ഇവിടെ ഈ കൊച്ചുകേരളത്തിൽ. നിങ്ങളുടെ ഗ്രാമത്തിലെ ആ മെന്റൽ അസൈലം എന്നത് അതിനുവേണ്ടി എത്രമാത്രം പാകപ്പെട്ടു കിടക്കുന്നു എന്നെനിക്ക് കാണാതെ പറയാനും വയ്യ. അതിനേക്കാളുപരി ഞാൻ ഒരു വലിയ പ്രസ്ഥാനത്തിന്റെ കുടക്കീഴിൽ ആണെന്നത് എനിക്കുള്ള സ്വാതന്ത്ര്യത്തേക്കാൾ അസ്വാതന്ത്ര്യമാണ് അനുവദിച്ചു തരുന്നത്. പിന്നെ എക്സോർസിസത്തിനുള്ള അപ്രൂവൽ കിട്ടുക എന്നതൊക്കെ ബുദ്ധിമുട്ട് പിടിച്ച കാര്യമാണ്. അതുകൊണ്ട് ഡോക്ടർ ദയവു ചെയ്ത് ഒരിക്കലും താങ്കൾ നിരാശപ്പെടില്ല എന്ന് കരുതി പറയട്ടെ, അത് നമുക്ക് മുന്നിൽ മറ്റൊരു മാർഗവും ഇല്ലെന്നു ഉറപ്പായാൽ മാത്രം ചെയ്യാനായി മാറ്റിവയ്ക്കാം. അതിന്റെ ഏതറ്റം വരെയും നിവർത്തിയില്ലെങ്കിൽ മാത്രം അന്ന് നമുക്ക് പോകാം.""
October 20, 2021